345 estudyante sa Davao Oriental Capitol nag Summer Job giseminar, nagtanom kahoy, nanglimpyo sa palibot

Davao Oriental (The Redline News Philippines (Visayan version) – Sa unang adlaw sa pagsugod sa 345 ka mga estudyante nga nag summer job sa kapitolyo dinhi nga Probinsya, sila giseminar bahin sa pag-amoma sa kinaiyahan, gipatanom sa kahoy ug gipalimpyo sa palibot.

Ang nag Summer Job dinhi nga probinsya motrabaho sulod sa 20 ka adlaw nga nagsugod April 10 ug mahuman Mayo 10 nga suweldohan ug P340 ang adlaw ug mokabat ngadto sa P6,800 ang sweldohon matag estudyante.

Matud pa sa Public Employment Services Office (PESO) Manager nga si Jay O. Dayanghirang nga aduna usab pagahimuon nga Sports Festival ang mga estudyante ug sa katapusang adlaw sa ilang pagtrabaho aduna usab himuong program kon culmination.

Ang mga topiko sa seminar nga gipatambongan sa mga estudyante atol sa unang adlaw sa ilang pagtrabaho mao ang Climate Change: Its Effect nga gipasabot ni Dr. Roy Ponce; State of the Environment in the Province of Davao Oriental ni Environmental Planner Dolores Valdesco, MAURP; Making Difference in Promoting Ecological Solid Waste Management (ESWM) ni Leo Gene Solamo; ug ang The Importance of Tree ni Forester Virgilio Alas III.

Governor Nelson Dayanghirang nalipay kay ang mga estudyante nakatanom ug sobra 1,000 ka mga kahoy didto sa daplin sa Mayo River sa ciudad sa Mati ug sa ilang pagpahigayon ug clean-up drive dapit sa Barangay Central sa Ciudad sa Mati. (By Sarx Lanos/posted by Becky D. de Asis-The Redline News Philippines)